Mar 3 | NdeBEN | STEP | Ngesinye isikhathi uJesu wangena esinagogweni, kukhona lapho indoda elesandla esitshwabheneyo.

Mark 3

UJesu Usilisa NgeSabatha

1 Ngesinye isikhathi uJesu wangena esinagogweni, kukhona lapho indoda elesandla esitshwabheneyo. 2 Abanye babo babedinga izaba lokubeka uJesu icala, yikho bamlinda ukubona ingabe wayezasilisa ngeSabatha. 3 UJesu wathi endodeni yesandla esitshwabheneyo, “Sukuma ume phambi kwabo bonke.”

4 UJesu wasebabuza wathi, “Kuyini okusemthethweni ngeSabatha; ukwenza okuhle loba ukwenza okubi, ukusindisa impilo kumbe ukubulala?” Kodwa bathula zwi.

5 Wabakhangela ngolaka, ehlutshwa yibuqholo bezinhliziyo zabo, wasesithi kuleyondoda, “Yelula isandla sakho.” Yaselula, isandla sesilunge saphelela. 6 AbaFarisi basebephuma bayacebisana lamaHerodiya ukuthi bangambulala njani uJesu.

Amaxuku Alandela UJesu

7 UJesu wasuka labafundi bakhe baya ngasechibini, ixuku elikhulu labalandela lisuka eGalile. 8 Bathi ngokuzwa konke ayekwenza abantu abanengi beza kuye besuka eJudiya, eJerusalema, e-Idumiya lemimangweni engaphetsheya kweJodani lezindaweni zeThire leSidoni. 9 Ngenxa yobunengi babantu watshela abafundi bakhe ukuba bamlungisele isikepe esincane ukuze angaminyezelwa ngabantu. 10 Phela wayesesilise abanengi, yikho labo ababelezifo babeminyezela befuna ukumthinta. 11 Kwakusithi imimoya emibi ingambona iguqe phambi kwakhe imemeze ithi, “UyiNdodana kaNkulunkulu.” 12 Kodwa wayiqonqosela ukuthi ingaze yakhuluma ukuthi ungubani.

Ukukhethwa Kwabapostoli Abalitshumi Lambili

13 UJesu wakhwela waya ewatheni lwentaba wabiza labo ayebafuna, beza kuye. 14 Wakhetha abalitshumi lambili ukuthi babelaye ukuze abathume ukuyatshumayela 15 lokuthi babelamandla okuxotsha amadimoni.

16 Yilaba abalitshumi lambili abakhethayo:

uSimoni (ametha ibizo wathi nguPhethro),
17 uJakhobe indodana kaZebhediya lomfowabo uJohane (laba wabetha ibizo wathi bango Bhowanegesi, okutsho ukuthi Amadodana Omdumo),
18 u-Andreya,
uFiliphu,
uBhatholomewu,
uMatewu,
uThomasi,
uJakhobe indodana ka-Alifewu,
uThediyasi,
uSimoni umZilothi
19 loJudasi Iskariyothi onguye owamnikelayo.

UJesu LoBhelizebhubhi

20 UJesu wangena kwenye indlu kwaphinda njalo kwabuthana kuye ixuku, yena labafundi bakhe baze behluleka ukudla. 21 Kwathi abendlu yangakwabo bekuzwa lokho bamlanda ukuyambuyisa ngoba bathi, “usephambene.”

22 Kwathi abafundi bomthetho abehla bevela eJerusalema bathi, “Ungenwe nguBhelizebhubhi! Ukhupha amadimoni ngenkosi yamadimoni.”

23 Ngakho uJesu wasebabiza wakhuluma labo ngemizekeliso wathi, “Kambe uSathane angamkhupha kanjani uSathane? 24 Nxa umbuso udabuke phakathi, uvukelana, lowombuso ngeke ume. 25 Nxa indlu ingabambananga, ivukelana, leyondlu ngeke ime. 26 Njalo nxa uSathane eziphikisa, edabuke phakathi, ngeke ame; useyatshabalala. 27 Ngempela, akakho ongangena endlini yesiqhwaga, abuthe impahla zaso ngaphandle kokuthi aqale asibophe lesosiqhwaga, andubana aphange indlu yaso. 28 Ngeqiniso ngithi kini, abantu bazakuthethelelwa zonke izono lokuhlambaza kwabo, 29 kodwa loba ngubani othuka uMoya oNgcwele akayikuthethelelwa; ulecala lesono saphakade.”

30 Wakutsho lokhu ngoba babesithi, “Ulomoya omubi.”

Unina KaJesu Labafowabo

31 Kwasekufika unina kaJesu labafowabo. Bema phandle bathuma omunye umuntu ukuyambiza. 32 Abantu abanengi babehlezi bemhanqile, basebemtshela bathi, “Unyoko labafowenu baphandle bayakudinga.”

33 Wabuza wathi, “Ngobani abangumama labafowethu na?”

34 Wasekhangela labo ababehlezi laye bemhanqile wathi, “Nampa abangumama labangabafowethu! 35 Loba ngubani owenza intando kaNkulunkulu ungumfowethu, ungudadewethu njalo ngumama.”